المهندس شادي أمين رئيس العمليات بالتحالف المصري، أعلن إن هيتم البدء في تطوير حديقتي الحيوان والأورمان بشكل رسمي، بعد ما استعرض مجلس الوزراء، المُخطط النهائي لمشروع التطوير. ومشروع تطوير حديقتي الحيوان والأورمان بيستهدف زيادة عدد فصائل الحيوانات المعروضة من 71 لـ 186 فصيلة، وكمان هيزودوا عدد المناطق الجاذبة للزوار هتوصل لـ 14 منطقة بدل من 3 مناطق حاليًا وكمان هيضيفوا أماكن للعروض، علشان مايقتصرش نشاط الزوار على أنهم يتفرجوا على الحيوانات بس. المشروع كمان هيتضمن إقامة مراكز تعليمية لـ تعليم الأطفال، وإضافة جزء ترفيهي، بجانب زيادة عدد المرافق الخدمية ومناطق البيع والمراكز الأمنية. والمُحددات التصميمية هتشتمل على الحفاظ على أشجار الحديقة اللي بيزيد عددها على 5000 شجرة وحماية حديقة الأشجار التراثية، بالإضافة لـ زيادة عدد الممرات والمسطحات المائية، وإقامة معارض الحيوانات كتجربة تشاركية وتفاعلية بين الحيوانات والزوار. والتصميم النهائي هيتضمن كمان تقسيم الحديقة من الداخل لـ عدة مناطق هتضم حيوانات بتمثل المنطقة الجغرافية ليها، وهما مناطق: آسيا، وأفريقيا، وأمريكا، والأسرة، ورحلات سفاري، وخيمة الطيور، ومنطقة مصر، ومنطقة الفيل، بالإضافة لـ منطقة التجربة الليلية اللي تمت إضافتها لمد ساعات الخدمة بالحديقة علشان يوفروا خدمة ترفيهية لساعات أطول للأسرة المصرية. #اللي_بيحصل #حديقة_الحيوان #الجيزة #حيوانات #تطوير #عدد_الفصائل #تطوير_الحديقة